Contos Estraños, v. 08: O choque dos mundos

Description

E se dous mundos completamente distintos mais unidos por elos invisíbeis se aproximasen tanto como para iniciaren un proceso de colisión inexorábel?
Sería grandioso podermos velo desde a nosa cadeira de brazos, tomando uns petiscos quizais e gozando desa botella de viño celosamente gardada e, como non, convenientemente cuberta de po.
No eido da literatura, vivimos nun momento semellante, só que, se cadra, non nos decatamos (ou será que non nos queremos decatar?). Os vellos paradigmas reséntense, renxen ante a entrada do novo. Cantidades inxentes de información, de historias e relatos que nin en dez mil vidas poderiamos ler, amoréanse a diario nas novas redes, nas vellas librarías que cheiran a papel e a tinta.
Seremos engulidos por esa voráxine? Acabaremos feitos cachizas entre o veloz martelo do dixital e a rexa bigornia da tradición? Quen o sabe? Porén, temos unha cousa clara:
Contos Estraños está de volta.